🌺अनुभव १६४

"श्री "

गजानन महाराज की जय! (🌺अनुभव १६४)

माय पुरवी बालक लळे, वेडे वाकुडे असले जरी

जय गजानन! जे जे कुणी भाविक भक्त शेगांवला श्री गजानन महाराजांच्या दर्शनासाठी जातात ते दर्शन झाल्यावर माघारी येतात ते मनात एक उर्जा घेऊन परततात. दर्शनासोबतच काही लहान मोठे अनुभव महाराजांनी गाठीशी बांधून दिलेत तर मिळणारी उर्जा अन् होणारा आनंद खचितच वाढलेला असतो. भाविकांना असाच आनंद शेगांवात महाराजांच्या सान्निध्याने पावन झालेल्या काही विशेष स्थळांना भेट देऊनही प्राप्त होतो.

नुकताच असा एक विशेष आनंद महाराजांनी मला माझ्या मागील एक दोन शेगांव भेटीत प्राप्त करून दिला.निमित्त होते माझी भाची सुरभी ढगे हिचे श्रीगजानन विजय ग्र॔थाचे मुखोदगत पारायण! तिही एक महाराजांची लीलाच म्हणावी लागेल. श्रीगजानन विजय ग्रंथात एकूण एकवीस अध्याय आणि तीन हजार सहाशे एकोणसत्तर ओव्या आहेत. सुरभी सुनील ढगे, आईचं नाव भाग्यश्री, हिला वयाच्या सात-आठ वर्षांतच एवढामोठा विजय ग्रंथ जवळपास मुखोदगत व्हावा ही दैवी लीलाच नाही का? गजानन महाराजांच्या कृपेशिवाय का हे शक्य झालं?

तर झालं असं की आपण पोथीत 'महाराज कृष्णाजीच्या मळ्यात रमले ' असं वाचतो. तोच मळा विकसित स्वरूपात भाविकांना दर्शनासाठी उपलब्ध आहे. त्या मळ्यात सुरभीच्या पारायणाचा कार्यक्रम पार पडला. कृष्णाजींचा मुलगा रामचंद्र, त्याचा उल्लेख बाराव्या अध्यायात आहे. महाराज म्हणतात " आमचा कृष्णा पाटील गेला, जो आम्हाला चिकण सुपारी देत असे, राम त्याचा मुलगा लहान. तो मोठा झाल्यावर आमची चाकरी करेल. " पुढे महाराजांचं भाकीत खरं झालं. याच रामचंद्र पाटीलांनी दासगणू महाराजांना पंढरपूर क्षेत्री विनंती करून दासगणू महाराजांकडून पुढे गजानन विजय ग्रंथ लेखनाचं दिव्य कार्य गजानन महाराजांनी घडवून आणलं.

श्रीगजानन विजय ग्र॔थात शेवटच्या अध्यायात रामचंद्र पाटलांना गजानन महाराजांनी गोसाव्याच्या वेषात त्यांच्या घरी येऊन उपदेश केल्याचा उल्लेख आहे. पाटलांना उपदेश करून गोसावी पाहता पाहता दिसेनासा झाला. याच पाटील कुटुंबातील वंशज श्री शैलेन्द्र पाटील यांच्याकडे सुरभी सोबत आमचा जेवण्याचा योग आला. ते घर, ती जागा, ते देवघर सर्व पाहून उर आनंदानं भरून आलं. शेगांवातील ते घर ती जागा पाहून शरीर आणि मनानं एक नवीन उर्जा प्राप्त केली आणि महाराजांवरील श्रध्दा अधिक दृढ झाली.

मी रक्षिता विकास अलोडे. गजानन महाराजांवरील श्रध्देविषयी म्हटलं की मला आठवतं लहानपणापासून महाराजांनी माझ्या मनातील अनेक इच्छांकडे आपुलकीनं लक्ष दिलं आहे. काही अनुभव मी श्रीगजानन अनुभव पुस्तकातून सांगितलेही आहेत. आपल्या इच्छा व्यक्त करण्यासाठी आपण अगदी शेगांवलाच गेलं पाहिजे असं नाही. तुमच्या नेहमीच्या मंदिरात अथवा उपासनेच्या ठिकाणी मनोभावे महाराजांना सांगा मनात त्यांना कळकळीने प्रार्थना करा की झालं! त्यांच्या योजना काही औरच असतात.

आमच्या त्रिमुर्तीनगर नागपूरच्या गजानन महाराज मंदिरात मी कधी कधी झाडण्याची सेवा देते. मंदिरात केरसुणी फिरविताना मनात म्हणायचे महाराज शेगांवला काही विशेष सेवा हातून घडवून घ्या. आम्ही आमच्या माधवनगर उपासना केन्द्रात दर एकादशीला गजानन महाराजांची उपासना करतो. त्यात शेवटी पाच मिनिटांचे मौन असते तिथे महाराजांशी संवाद साधतानाही म्हणायचे ' महाराज शेगांवला सेवा घडू द्या, समाधीचं तीर्थ मिळू द्या, शेजारतीचा विडा मिळेल तर किती छान नं? मग माझंच मला हसू येऊन दासगणुंचे शब्द आठवायचे 'माय पुरवी बालक लळे, वेडे वाकुडे असले जरी ' खरच आपण महाराजांना काय काय मागत असतो? पण देतात लक्ष महाराज! माझही म्हणणं पोहोचलं त्यांच्यापर्यंत.

३० एप्रिल, १मे व २मे २३ ला सुरभीचं कृष्णाजींच्या मळ्यात श्रीगजानन विजय ग्र॔थ पारायण आयोजित होतं. पहिल्या दिवशी पारायण कार्यक्रम आटोपून आम्ही दर्शनासाठी गेलो सोबत लहान रिशंक होता. रिशंक पोटात असतानाच महाराजांनी लहान सहान इच्छा पुरवून जणू माझे डोहाळे पुरविले होते. त्या दिवशी दर्शन बारीत दोन अडीच तास उभे राहून नंतर महाप्रसादासाठी पुन्हा दोन तास आम्ही लाईनमधे ताटकळत होतो. त्या सर्व परिस्थितीत कंटाळून रिशंक म्हणू लागला ' आई हे डेंजर आहे मी पुन्हा नाही येणार! ' मी महाराजांना म्हणत होते, बघा महाराज याच्याकडे लक्ष असू द्या!

त्या तीन दिवस सुट्या लागून आल्यामुळे शेगांवात प्रचंड गर्दी होती. १मे ला आम्ही केवळ दर्शन घेतलं. २ मे ला सकाळीच दर्शनासाठी गेलो. सकाळी राम मंदिरात दर्शन घेऊन पुढे निघणार तो एका सेवाधारी माऊलींनी आवाज दिला. माऊली तुमची सेवेसाठी निवड झाली आहे. वेळ आहे का? सेवा देणार का?

आज दानपेटी मोजण्यास यांची निवड झाली आहे

आम्हाला क्षणभर समजलंच नाही. भानावर येऊन आम्ही माऊलीला नमस्कार करण्यासाठी वाकलो तर ते म्हणाले माझ्या पाया पडू नका, बाबांच्या पाया पडा तुमची निवड मी नाही बाबांनी केली. ते ऐकून मी रडू लागले. हजारो लोकांमधून बाबांनी विकासला पर्यायानं आम्हा कुटुंबियांना निवडलं होतं. मंदिराच्या रजिस्टर मधे विकास च्या स्वाक्षरीची नोंद! गजानन महाराज की जय! त्या दिवशी आम्हाला मिळालेली वागणुक पाहून रिशंकच्या मनातील 'डेंजर ' हा शब्द पार हद्दपार झाला. महाराजांनी त्या दिवशी आमच्याकडून शेगांवला लाख मोलाची अमूल्य सेवा घडवून घेतली. दुसरे दिवशी आम्हाला नागपूरला परतायचं होतं म्हणून सकाळीच दर्शनाकरीता मंदिरात पोहोचलो. श्रीरामाचं दर्शन घेऊन वळलो तो सेवेकरी म्हणतात माऊली एक मिनिट थांबा. मी विकासकडे बघितलं, दोघांच्याही चेहर्‍यावर आश्चर्याचे भाव उमटले, काही क्षण मधे गेलेत आणि आता आमच्या चेहर्‍यावर कृतार्थतेचे भाव प्रकट झाले होते. डोळे डबडबले, पिवळटसर रंगाचं सुगंधीत तीर्थ असलेली बाटली आम्ही भावपूर्णतेने स्वीकारली अन् आम्ही धन्य झालो. आम्ही माघारी परतलो.

मधे काही दिवस गेलेत. सुरभीच्या पारायणाचा कार्यक्रम छान पार पडला होता. सुरभीचं कौतुक म्हणून सुरभीच्या आई बाबांसोबत मलाही पाटलांकडे जेवण्याचा योग जुळून आला. सुरूवातीला जे नमूद केलं तोच हा योग! महाराजांजवळ मी तीन गोष्टी म्हटल्या होत्या. त्यातील दोन पूर्ण झाल्याच होत्या. त्या रात्री आमचं दोनदा दर्शन झालं होतं, तिसऱ्यांदा मी दर्शनाला गेले पण भाग्यश्री ताई, सुरभी व रिशंक पारायण मंडपातच होते. विडा मिळावा अशी खूप आस मनात होती. मला तो नाही मिळाला पण इकडे एका आजींनी या तिघांना तो आणून दिला. मी उदास मनाने तिथे आले, तो रिशंक जवळच मला दोन कण पडलेले दिसले. मी तत्परतेने ते उचलले. महाराजांना कळवळून प्रार्थना केली, एक कण मी अन् एक कण विकासनी जिभेवर ठेवला.

दुसरे दिवशी निघण्यापूर्वी सकाळीच दर्शनास गेलो तो ज्या सेवेकर्‍यांनी आम्हाला ' सेवेची संधी आहे ' म्हटलं होतं ते भेटले, त्यांनी चौकशी केली आणि विचारलं तुम्हाला काल विडा मिळाला की नाही? हा घ्या विडा मी खिशात सांभाळून ठेवला आहे.

आमच्यासाठी विडा ठेवण्याची प्रेरणा कुणी दिली हे जाणून आम्ही तो विडा स्वीकारला, श्रध्देने हात कपाळावर नेले आणि एकमेकांकडे पहात दोघेही म्हणालो.. श्रीगजानन! जय गजानन! श्रीगजानन! जय गजानन!

🌺अनुभव-- सौ.रक्षिता विकास अलोडे ,नागपूर

शब्दांकन--जयंत वेलणकर 9422108069

🌺आपल्या जवळ गजानन महाराजांविषयी काही अनुभव असल्यास स्वागत आहे.

🌸अवश्य वाचा श्रीगजानन अनुभव पुस्तक

भाग एक, यात बावन्न अनुभव आहेत. भाग दोन यात एकूण बावन्न अनुभव आहेत (५३ ते १०४ ) भाग तीन बावन्न अनुभव आहेत सहयोग राशी प्रत्येकी फक्त रुपये पन्नास

श्रीगजानन अनुभव पुस्तक एमेझाॅन वर उपलब्ध आहे