🌺अनुभव १६५

"श्री"

गजानन महाराज की जय! (🌺अनुभव १६५)

गजानन महाराजांचा परीसस्पर्श

जय गजानन! मानवी जीवनात घडणाऱ्या घटनांपैकी काही घटना आपल्या विस्मरणात जातात तर काही नेहमीकरीता आपल्या स्मरणात राहतात. अशाच एका घटनेने माझ्या मनात कायमचं घर केलेलं आहे. घटना आनंददायी निश्चितच नव्हती, पण परिणाम चांगला होता. ज्यातून गजानन विजय ग्रंथ आणि अर्थातच समर्थ सद्गुरू श्रीगजानन महाराजांचा प्रवेश आमच्या आयुष्यात झाला.

नर्मदा! माझ्या आत्याचं नाव. या नर्मदा आत्या मुळे आमच्याकडे गजानन महाराजांची भक्ती सुरू झाली.पण यात आत्याला भरपूर भोगावं लागलं. माझ्या लहानपणी माझे वडील नागपूरला एका साॅ मिल मधे दिवाणजी म्हणून कामाला होते. बहिणींची जबाबदारी त्यांच्यावरच होती. चंद्रपूरचं एक स्थळ चालून आलं. जुजबी माहितीवर लग्न पार पडलं आणि वडिलांच्या लक्षात आलं, आपली फसगत झाली. नर्मदेचा जीवन प्रवाह एक अडथळ्याची शर्यत ठरला. मिस्टरांची कौटुंबिक पार्श्वभूमी अजिबात योग्य नव्हती. आत्याला जाच सुरू झाला.

माझ्या वडिलांना साॅ मिल मधील बर्‍यापैकी ज्ञान प्राप्त झालं होतं. त्या आधारावर त्यांनी यवतमाळला साॅ मिल सुरू करण्याचं ठरवून आत्याच्या मिस्टरांना देखील तिथे बोलावून घेतलं, जेणेकरून आत्याचा त्रास निदान काही अंशी कमी व्हावा.

आता आम्ही सर्व कुटुंबिय यवतमाळला आलो होतो. अंदाजानुसार आत्याला होणारी शारीरिक मारहाण थोडी कमी झाली. पण ज्या माणसाला दारा आणि दारूचं व्यसन असेल, अर्थात बाई बाटलीचा नाद असेल तो त्या मोहात सर्व लाज कोळून प्यायला असतो. हे सर्व प्रकार आत्याच्या नजरेसमोर घडत असतील तर त्या बिचारीला किती प्रचंड मानसिक त्रास सहन करावा लागला असेल. आत्या रोज झुरत होती, प्रत्येक दिवशी मरत होती. तिच्या या यातना पाहून कुणा गजानन महाराज भक्ताला तिची कीव आली आणि तिला सल्ला मिळाला ' शेगांवच्या गजानन महाराजांना शरण जा. श्रीगजानन विजय ग्रंथाचं पारायण करीत जा. ' तेच तुला यातून मुक्त करू शकतात!

आत्या विजय ग्रंथाचं पारायण करू लागली. दिवस समोर सरकत होते, त्रास मात्र तसाच होता. चौदाव्या अध्यायात भक्त महाराजांना नर्मदा दर्शनासाठी चलण्याचा आग्रह करतात तेव्हा महाराज म्हणतात ' भेटा माझ्या नर्मदेला, मात्र मला आग्रह करू नका!' ही ओवी वाचून आत्याच्या मनात येत असेल, ' महाराज ती नर्मदा माझी म्हणता, मग या नर्मदेकडे दुर्लक्ष का? ' आत्या आतल्या आत रडत होती. महाराजांना विनवत होती. पारायणांची संख्या वाढत होती. त्या दिवशी कदाचित भावनांचा उद्रेक झाला असेल, महाराजांना कळवळून प्रार्थना झाली. विजय ग्र॔थात प्रसंग आला. ' बायजा बाईच्या जेष्ठ दीराने तिला त्रास देण्याचा प्रयत्न करताच त्याचा मुलगा माडीवरून खाली पडल्याचा प्रसंग असावा, आत्याला आलेला हुंदका कदाचित महाराजांच्या कानावर गेला. आत्याची प्रार्थना महाराजांच्या चरणी रुजू झाली असावी. त्यावेळचं पारायण पूर्ण झालं. त्याच रात्रीची गोष्ट!

रात्री सर्व गाढ झोपेत होते. आत्याचे मिस्टर, ज्यांना आम्ही मामाजी म्हणत असू. अचानक ओरडतच झोपेतून उठले. घामाने ओलेचिंब झाले होते. भितीने थरथरत होते. अन् मोठ्याने म्हणत होते.... ' नाही नाही मला मारू नका. माझं चुकलं. इथून पुढे दारूला स्पर्श करणार नाही. सर्व वाईट सवयी सोडून देईन, पण मला मारू नका. माफ करा!'

घरातील सर्व जागे होऊन त्यांच्याजवळ उभे झालेत. ते सांगू लागले, एक नंगा बाबा आला त्यानं मला चांगलच चोपलं. मार दिला. माझ्या करणी करीता मला रागवत होता. मला त्यांची भिती वाटतेय. यापुढे मी चांगला वागेन, कुणाला त्रास देणार नाही! सर्वांशी प्रेमाने वागेन!

सर्वांनाच वाटलं असेल स्वप्न पडलं. हा माणूस काय सुधारणार आहे? पण प्रत्यक्षात अघटित घडलं. त्या दिवशी अक्षरशः गजानन महाराजांचा परीसस्पर्श मामाजींच्या आयुष्याला झाला. अगदी दुसर्‍याच दिवसापासून त्यांच्या वागण्यात आमुलाग्र परिवर्तन होऊन काही दिवसातच मामाजी आमच्या कुटुंबात आणि समाजात सर्वांना प्रिय झालेत. आता नंगा बाबा कोण? हे मामाजींना कळलं होतं आणि आत्याचा तर प्रश्नच नव्हता. गजानन महाराजांच्या भक्तीत न्हाऊन निघालेली 'नर्मदा ' ज्याला त्याला गजानन महाराजांची महती सांगू लागली होती.

अशातच एक दिवस माझ्या भाचीला लहान वयातच ' मेनिंजाइटिस ' चं निदान झालं. डाॅक्टरांनी तिला नागपूर मेडिकल कॉलेज हाॅस्पिटलला भरती करण्याचा सल्ला दिला. ते म्हणालेत दुःख विकोपाला गेलं आहे. वाचेल की नाही सांगता येत नाही. वाचली तरी एखादा अवयव निकामी होऊ शकतो. ते ऐकून आम्हा सर्वांनाच दुःखाचा आणि भितीचा तीव्र धक्का बसला. मला पाठोपाठ आठवलेत ते 'गजानन महाराज! ' मी सौ.हेमा कुकडे, यवतमाळ . मी घरीच महाराजांच्या फोटोसमोर हात जोडून उभी झाले आणि महाराजांना नवस बोलले ' महाराज जर माझ्या भाचीला तुम्ही सुखरुप ठेवलं तर मी नाॅनव्हेज खाणं सोडून देईन! ' आज हे सगळं सांगणं सहजपणे होऊन जातं पण आजारपणाचे ते चार महिने कुटुंबातील मानसिकता काय होती? हे फक्त ज्याने अशी परिस्थिती अनुभवली आहे तोच जाणू शकतो. असो! महाराज नवसाला पावले. मामाजींच्या प्रसंगात त्यांची दारू सुटली आणि भाची सुखरुप राहून आमचं नाॅनव्हेज खाणं सुटलं!

असे वैविध्यपूर्ण अनुभव गजानन महाराज आपल्या भक्तांना देतच असतात. आपला अनुभव आपल्या गुरू बंधू भगिनींना सांगावा असं वाटून काही सांगण्याचा हा प्रयत्न! बाकी, हरवलेली सोन्याची अंगठी सापडणं, मनासारखा परीक्षेचा निकाल लागणं, अशा सारख्या गोष्टीही महाराजांच्या कृपेने घडल्या आहेत. आता गजानन महाराजांना एकच मागणं. ' जो जो शरण येईल त्याच्यावर तुमची कृपादृष्टी असू द्या आणि त्याच्या मुखी सतत तुमचा जयघोष असू द्या श्री गजानन! जय गजानन! श्री गजानन! जय गजानन!

🌺अनुभव-- सौ. हेमा कुकडे यवतमाळ

शब्दांकन -- जयंत वेलणकर 9422108069

🌺आपल्या जवळ गजानन महाराजांविषयी काही अनुभव असल्यास स्वागत आहे.

🌸अवश्य वाचा श्रीगजानन अनुभव पुस्तक

भाग एक, यात बावन्न अनुभव आहेत. सहयोग राशी फक्त रुपये पन्नास. भाग दोन यात एकूण बावन्न अनुभव आहेत (५३ ते १०४ ) फक्त रुपये पन्नास.भाग तीन बावन्न अनुभव फक्त रुपये पन्नास

श्रीगजानन अनुभव पुस्तक एमेझाॅन वर उपलब्ध आहे