🌺अनुभव १६६ 🌺

"श्री "

गजानन महाराज की जय!( 🌺अनुभव १६६)

नजर त्यांची भक्तांवर

जय गजानन! 'समर्थ सद्गुरू गजानन महाराजांची उपासना दर एकादशीला होत असते ,तुम्ही येऊ शकता!' असा निरोप आठ एक वर्षांपूर्वी मला मिळला तेव्हा मला आश्चर्यही वाटले आणि आनंदही झाला. आश्चर्य यासाठी की ' गजानन महाराज उपासना ' हे शब्द आज जरी आपल्या बर्‍यापैकी परिचयाचे झाले असले तरी आठ नऊ वर्षांपूर्वी स्वतंत्रपणे गजानन महाराजांचीच उपासना ही संकल्पना भक्तांना तेवढी परिचयाची नव्हती आणि आनंद यासाठी की मुळात आतमधे जी गजानन महाराजांची भक्ती होती तिला नव्याने उभारी मिळणार होती.

माझी उपासना सुरू झाली. आम्ही उपासनेत प्रामुख्याने नामजप करतो आणि मौनात चिंतन करतो. महाराजांशी संवाद साधण्याचा प्रयत्न करतो. उपासकांच्या चर्चेत कुणी भक्त एकदा बोलले महाराजांशी संवाद साधण्याचा प्रयत्न करावा. कधी महाराज आपल्याला संकेत देतात. संवेदनशील मनाला ते निश्चितच लाभदायी ठरतात. या कल्पनेने माझ्या मनाला आनंद झाला आणि माझं मन महाराजांविषयीच्या विचारात रंगून गेलं.

आपल्याला महाराज कधी संकेत देतील का? या विचारात रंगून महाराजांच्या फोटोसमोर पूजेला बसलं की पूजेत आनंद मिळू लागला. अशात चातुर्मास नामजपात दर गुरुवारी घरी काही गुरूभगिनी एकत्र येऊन नामस्मरणही होऊ लागलं.

साधारण वर्षापूर्वीची गोष्ट असेल, मला पूजेत महाराज खूप काळजीत आहेत असा भास होऊ लागला. मी पण त्यामुळे थोडी चिंतित झाले. मी महाराजांना म्हटलं, आमची काळजी तुम्हाला! संकट येणार असेल तर ते निवारण्याची शक्तीही तुम्हीच देणार. काही दिवस मधे गेलेत आणि महाराजांनी स्पष्ट संकेत दिला ' त्याच्या टेस्ट करून घ्यायला हव्यात ' प्रथम मी त्याकडे दुर्लक्ष केलं पण पाच सात दिवसांतच माझ्या कानात स्पष्ट शब्द घुमलेत ' त्याच्या टेस्ट करवून घे .मग मात्र मी हे मिस्टरांना सुचवलं की आपण तुमच्या तब्येती साठी काही टेस्ट करून घ्यायच्या का? त्यावर त्यांनी म्हणणं उडवून लावलं. म्हणाले, मी एकदम फीट आहे. छान सायकलींग चालू आहे. फिरायला जातो आहे. गॅरेज मधे काम करतोय, मला काय धाड भरली? कशाला करायच्या टेस्ट?विनाकारण खर्च!

माझ्या मिस्टरांचं फोर व्हीलर साठी गॅरेज आहे. गॅरेज ते स्वतः सांभाळतात. त्यांचं नाव जयंत नायक आणि मी सौ. भाग्यश्री नायक. टेस्ट साठी जायचं तर गॅरेज बंद ठेवावे लागणार. खंडित विद्युत पुरवठा वगैरे कारणास्तव बुधवार योग्य ! टेस्ट करायच्या न करायच्या यात काही दिवस गेलेत त्यात मिस्टरांचा वाढदिवस आला. घरात फार आग्रह होता म्हणून वाढदिवसासाठी केक आणला. त्याच संध्याकाळी देवासमोर दिवा लावताना महाराजांनी स्पष्ट संकेत दिला ' अगं केक बिक काय कापत बसलीस? त्याच्या टेस्ट करवून घे! ते जास्त महत्वाचं आहे!' मग मात्र मी घाबरले आणि जयंत ला म्हटलं, मी आतापर्यंत बोलले नाही पण आज सांगते, तुमच्या टेस्ट करवून घे हे मला गजानन महाराज सुचवताहेत! हे ऐकून मात्र जयंतलाही धस्स झाले.त्यांचाही महाराजांवर विश्वास आहेच. म्हणून तर ते गेल्या काही वर्षांपासून कुणी सुचवल्यामुळे तब्येती साठी नियमित गजानन विजयचा तेरावा अध्याय वाचत आले आहेत.

लगेचच्याच बुधवारी आम्ही एम्स हाॅस्पिटलला पोहोचलो. आश्चर्य म्हणजे ' फीट ' असणाऱ्या जयंतच्या टेस्ट बी.पी.,ईसीजी, कोलेस्टेरॉल इत्यादी सर्वच बाबतीत गडबड आढळून आली आणि आम्ही चिंताग्रस्त झालो. मात्र लगेच सावरलो, कारण गजानन महाराजांनी मार्ग दाखवून दिशादर्शन केलं आहे, तेव्हा सांभाळ ते करणारच! ही खात्री मनाला आश्वस्त करीत होती. शिवाय अज्ञानाच्या अंधारात राहून बेफिकीर असण्यापेक्षा सत्याची जाणीव झाली होती ते महत्त्वाचं होतं. एम्स च्या डाॅक्टरांनी एक बीपीची गोळी व अन्य औषध दिलं.

गजानन महाराजांचं नाव घेतच आम्ही आमचे नित्याचे होमिओपॅथी डाॅक्टर संदीप मोहरील यांची भेट घेतली. प्रथम त्यांना सांगितलं की सहज म्हणून आम्ही या टेस्ट करून घेतल्या ,त्याचे हे रिपोर्ट्स आहेत. रिपोर्ट्स पाहून ते विचारात पडले व म्हणाले तुम्हाला विशेष त्रास नाही म्हणता तेव्हा एकदा असं करा, प्रायव्हेट दवाखान्यात या टेस्ट पुन्हा एकदा करून घ्या. शिवाय त्यांनी 'होमोसिस्टीन' ही एक टेस्ट सुचविली . आम्ही ते सर्व करून रिपोर्ट्स घेऊन त्यांना भेटायला गेलो.

सर्व रिपोर्ट्स पाहून डाॅक्टर म्हणाले, तुम्ही खूप लकी आहात. अगदी योग्य वेळेत सर्व होतंय. भाग्यवान आहात थोडा वेळ झाला असता तर हार्ट अ‍ॅटॅक, ब्रेन स्ट्रोक, पॅरॅलिसिस,काहीही होऊ शकलं असतं. आपण जी जास्तीची टेस्ट केली ती या सर्वाचा शोध घेण्यासाठीच. त्यांनी पंधरा पंधरा दिवसांनी चेकअप साठी येण्याचा सल्ला देऊन, जयंत ना गॅरेजचं काम करा परंतू सध्या बाकी गोष्टींवर मर्यादा असू द्या असा सल्ला दिला आणि पुढील धोका टळावा या साठी औषधं सुरू केलीत. या दरम्यान अजून एक संकेत जणू महाराजांनी दिला. आम्ही दर एकादशीला वेलणकर काकांकडे उपासनेला जातो. तिथे मला महाराजांच्या फोटोत डाव्या भागाला सुजल्या सारखं काही भास होऊ लागला. मी घरी येऊन जयंत आणि माझ्या मुलीला, श्रेयाला, डाव्या बाजूची काळजी घ्या!,असं आपलं काळजी पोटी सांगितलं. काही महिन्यातच एक दिवस मिस्टर गॅरेज मधून लवकर घरी आलेत. ते म्हणालेत मला डाव्या भागात हर्निया आहे आणि डॉक्टरांनी त्याचं ऑपरेशन करावं लागेल असा सल्ला दिला आहे. अर्थातच हर्नियाचं ऑपरेशनही पार पडलं. महाराजांच्या कृपेने सगळं व्यवस्थित झालं.

त्या दिवशी आम्ही डाॅक्टरांच्या केबीन मधे होतो. ते आग्रहाने विचारू लागले, अशा केसमधे सहसा ऑपरेशनची वेळ आली की नंतरच समजतं, तब्येतीत बिघाड झाला आहे. पण तोपर्यंत उशीर झालेला असतो आपण फारसं काही करू शकत नाही. तुम्ही मात्र योग्य वेळेत, काहीही लक्षण नसताना, हे सर्व साधलं कसं? हा प्रश्न माझ्या मनात घर करुन आहे.

त्यांच्या या विचारण्यावर मात्र मी बोलले. ही सर्व गजानन महाराजांची कृपा! त्यांनी वेळीच संकेत दिलेत आणि सांभाळून घेतलं. डाॅक्टर तुम्ही आमच्यासाठी देव आहात.

डाॅक्टरांच्या दवाखान्यात गजानन महाराजांची सुंदर मूर्ती आहे. तिकडे इशारा करून ते बोलले. अहो करता करविता तोच आहे. मला तर वाटतं तुमच्या तुमच्या वाट्याला हार्ट अथवा ब्रेनचं मोठं ऑपरेशन होतं पण ते महाराजांनी हर्नियावर निभावलं. मी निमित्त मात्र आहे. तुम्हाला औषध देण्याचे संकेत मलाही महाराजांनीच दिले आहेत. आता एकदा पुन्हा टेस्ट करून घ्या एप्रिल महिन्यात सुरू झालेली ही औषध योजना! आता आपण ऑक्टोबर महिन्यात पोहोचलो. माझं मन सांगतं आहे तेव्हा टेस्ट करवूनच घ्या.

सर्व टेस्ट झाल्यात. पूर्ण रिपोर्ट्स नाॅर्मल आलेत. मी आनंदाने महाराजांसमोर उभी झाले. आता महाराजांच्या चेहर्‍यावर कुठलीही काळजी नव्हती. किंबहुना स्मित हास्य होतं आणि जणू ते म्हणत होते, काय झालं नं सर्व ठीक? त्यावर मी काय बोलणार? डोळ्यातील अश्रूंना वाट करून देत हात जोडले, हुंदका गिळला अन् आतल्या आत बोलले.. श्रीगजानन!जय गजानन!श्रीगजानन!जय गजानन!

🌺अनुभव-- सौ भाग्यश्री जयंत नायक, नागपूर

शब्दांकन -- जयंत वेलणकर 9422108069

🌸आपल्या जवळ गजानन महाराजांविषयी काही अनुभव असल्यास स्वागत आहे.

अवश्य वाचा श्रीगजानन अनुभव पुस्तक

भाग एक, यात बावन्न अनुभव आहेत. सहयोग राशी फक्त रुपये पन्नास. भाग दोन यात एकूण बावन्न अनुभव आहेत (५३ ते १०४ ) फक्त रुपये पन्नास.भाग तीन बावन्न अनुभव फक्त रुपये पन्नास

श्रीगजानन अनुभव पुस्तक एमेझाॅन वर उपलब्ध आहे.