🌺अनुभव १६७ 🌺

"श्री "

गजानन महाराज की जय! (🌺अनुभव १६७)

उतरले स्वप्न सत्यात !

जय गजानन! मानवी जीवन म्हटलं की जीवनात, अडचणी, संकटं येणारच. मानवी जीवनात बरेचदा येणाऱ्या संकटापेक्षा त्या संकटाची चाहूल जास्त भयावह असते. अशा वेळी सद्गुरूंच्या नामाचा आधार आपणास खूप मदतरूप ठरतो आणि त्यातूनच पुढे सद्गुरूंचा कृपाशिर्वाद प्राप्त झाला, तर आपण त्या परिस्थितीतून तरून जातो.

सोमवार ८ मे २०२३ ची रात्र! त्या रात्री झालेला तो रक्तस्त्राव मी पाहिला अन् मनातून पार हादरून गेले. वयातील प्रौढत्वामुळे असलेला अनुभव आणि अकाली असलेली ती घटना मनात धोक्याची घंटा वाजवून गेली आणि हे काहीतरी वेगळं प्रकरण आहे याची मनाला जाणीव झाली. त्याच रात्री सुपर स्पेशालिटी हाॅस्पिटलला अनेस्थेशिया हेड ऑफ द डिपार्टमेंट, माझी मैत्रीण 'लूलू फातिमा अली ' हिला फोन लावून वृत्त कथन केलं. तिने दुसरे दिवशी चेकअप करून घेऊ म्हटलं आणि भयावह संकटाची चाहूल लागून, समर्थ सद्गुरू श्री गजानन महाराजांच्या नामस्मरणासोबत त्या काळातील माझा पुढील प्रवास सुरू झाला.

मी सौ. कल्पिता किनखेडे. आम्हाला सुखदुःखाच्या कुठल्याही प्रसंगात प्रथम आठवतात ते शेगांवचे गजानन महाराज! अर्थातच संकटकाळी धावा होणार तो गजानन महाराजांचा. श्रीगजानन विजय ग्रंथाचं नित्य पारायण होत असतंच. काही वर्षांपासून आता जोडीला 'श्रीगजानन अनुभव'चे तीन भाग सोबतीला आहेत. त्यातील अनुभव वाचलेत की गजानन महाराजांच्या सान्निध्यात असल्याचा आनंद मिळत राहतो. असो!

त्याच रात्री मी फातिमाला फोन केला. तिचा या क्षेत्रातील अनुभव गाठीशी धरून तिला परिस्थितीची जाणीव झाली. ती बोलली. ' कल्पिता वर्णनावरून प्रकरण गंभीर वाटतंय. ' योगायोगाने मी दोन दिवसांनी यू. एस. ला जाते आहे. तेव्हा तू उद्याच ये आपण सर्व टेस्ट करवून घेऊ. दुसरे दिवशी म्हणजे मंगळवार दिनांक ९ मे ला युरोलाॅजीचे एच. ओ. डी. डाॅक्टर सेलोकर यांना भेटले त्यांनी काही टेस्ट करायला सांगितल्या. त्या पैकी काही ९ मे ला तर बाकी १० मे ला करवून घेतल्यात. ब्लड टेस्ट आणि सोनोग्राफीत काही एबनाॅर्मल जाणवलं. युरीन ट्रॅक मधे गाठ आढळून आली त्यामुळे तातडीने ऑपरेशन करणं गरजेचं झालं.

११ मे गुरुवार! महाराजांचा वार! सकाळी उठून मी श्री गजानन विजयचा तेरावा अध्याय वाचला. महाराजांना म्हटलं, ' महाराज ऑपरेशनच्या वेळी तिथे हजर असा. डाॅक्टरच्या हाताला यश देणारे तुम्ही आहात.

ऑपरेशन झालं, एक लहान ट्युमर रिमूव्ह करण्यात आला आणि बायोप्सी साठी पाठविण्यात आला. हा जीवघेणा आजार आहे याची जाणीव अस्वस्थ करून गेली. जीवाची घालमेल होत होती. श्रीगजानन अनुभव पुस्तक हातात घेऊन महाराजांना कळवळून म्हणत होते, महाराज इतक्या लोकांना तुम्ही अनुभव दिला आहे मग मला निराश कसे करणार?' साधारण आठ एक दिवसात रिपोर्ट आला. ती सुरूवात होती माझ्यासाठी एका आजाराची,अन् डोक्यावर प्रचंड टेन्शन घेऊन जगण्याची.

चिंताग्रस्त जीवन सुरू झालं. डोक्यात एकच विचार, कुणाची ट्रीटमेंट घ्यावी? काय औषध घ्यावं? मनात कुठेतरी ऐकलेलं एक वाक्य घर करून होतं.

' डेथ इज मोअर पीसफूल दॅन द् ट्रीटमेंट ' सिटी स्कॅन, एन्डोस्कोपी, आदी गोष्टींना सामोरे जात होते. आजूबाजूचे लोक दोन धीराचे शब्द बोलत होते. भेटणारी व्यक्ती अमुक करा, तमुक करा. सूचना देत होती. डोक्यात विचारांचा गोंधळ माजला होता. अशातच एका संध्याकाळी मी महाराजांसमोर बसले. माझा धीर खचला अन् मी महाराजांशी बोलू लागले. का अंत पाहता? मी नेमके काय उपचार घेऊ? यातून मी कशी बाहेर पडेन? बोलता बोलता मला रडायला आलं. त्या दिवशी मी हमसून हमसून रडले. आर्ततेने महाराजांना विनवणी केली की काही मार्ग सुचवा. मला थकवा जाणवला, काही मार्ग सुचवा असं पुटपुटत मी उठले अन् अंथरुणावर पहुडले आणि गाढ झोप लागली. त्याच रात्री पहाटे पहाटे मला स्वप्न पडलं. त्यात मी पाहिलं. ' मी घरात बसले आहे. दारावरची बेल वाजली, मी दार उघडलं, दारात एक तरुण उभा होता. तो माझ्याकडे पाहून बोलला, हे औषध श्रुती आयुर्वेद पुणे यांच्याकडून! त्यानं मला एक बाॅक्स दिला, त्या बाॅक्स वर अक्षरं होती.. ' श्रृती आयुर्वेद पुणे ' मी तो बाॅक्स घेतला, आत आले. तो मुलगा मला व्यवस्थित, नीटनिटका आणि सुशिक्षित वाटला. तो गेला मी दार बंद केलं आणि मला जाग आली. मला जाग आली आणि मी स्वप्नात हरवले. कारण त्या स्वप्नाचा अर्थ होता, मी काल संध्याकाळी गजानन महाराजांना केलेली प्रार्थना त्यांनी ऐकली होती. मला आयुर्वेद ट्रीटमेंट घ्यायची होती. मात्र श्रुती आयुर्वेद हे कुठंही नं पाहिलेलं न ऐकलेलं नाव आता शोधायचं होतं. आम्ही शोध सुरू केला. मी अगदी काळजीपूर्वक मोबाईल वर शोध घेऊ लागले. माझ्या डोळ्यासमोर चक्क ' श्रुती आयुर्वेद पुणे ' असं नाव आढळलं. नंबरही दिसला. मी त्यांना मेसेज केला. ' मी कल्पिता. माझा भाऊ तुमच्याशी संपर्क साधून बोलेल. '

त्या प्रमाणे भावाने त्यांच्याशी संपर्क साधला. आम्हाला समजलं ते डाॅक्टर संजय कुलकर्णी आहेत आणि आश्चर्याची बाब म्हणजे ज्या कारणासाठी मला औषध हवं आहे त्यातच ते स्पेशालिस्ट आहेत. इतकंच नाही तर ते परदेशातही औषध पाठवितात. भावाने त्यांची फी काय? ते कुरिअर ने औषध पाठवतील का? आदी चौकशी केली आणि असं ठरलं की, मी, माझे मिस्टर, भाऊ व तिकडील दोघं तीघं, असा एक काॅन्फरन्स काॅल व्हावा व सविस्तर चर्चा व्हावी.

ठरल्या प्रमाणे व्हिडिओ काॅन्फरन्स काॅलची योजना झाली. मी, माझा भाऊ व मिस्टर. आम्ही होतो तर डाॅक्टर संजय कुलकर्णीं सोबत दोघं होते. प्रथम मी त्यांना सर्व हकिकत सांगून स्वप्नातून हे नाव कळल्याचं सांगितलं. बोलता बोलता माझी नजर त्यांच्या बाजूस बसलेल्या तरूणाकडे गेली. मला एकदम वाटून गेलं की आपण याला कुठे पाहिलं आहे . मी त्यांना विचारलं, हा कोण? म्हणाले, हा माझा मुलगा .म्हटलं, अहो हाच तर तो! ज्याला औषधाचा बाॅक्स घेऊन स्वप्नात मी पाहिला. त्यांना अतिशय आनंद झाला. ते म्हणालेत, जिथे प्रत्यक्ष गजानन महाराज यात माध्यम आहेत तेव्हा ' फी ' हा मुद्दा गौण आहे. ट्रिटमेंट मह्त्वाची आहे. पुढे म्हणाले, ठीक, ठरलं. आता मी तुम्हाला औषध घरपोच पाठवतो चिंता नको, होईल सर्व ठीक.

ठरल्या प्रमाणे काही दिवसात औषधाचा बाॅक्स

' श्रुती आयुर्वेद पुणे ' यांचे कडून घरी पोहोचला .

तो बाॅक्स पाहून माझ्या आश्चर्याला आणि आनंदाला पारावार उरला नाही. जो मी स्वप्नात पाहिला होता जवळपास तोच बाॅक्स आता माझ्या समोर होता.

माझी ट्रीटमेंट सुरू झाली. आता तब्येत सुधारते आहे. डाॅक्टरांच्या म्हणण्यानुसार आता सर्व ' आऊट ऑफ डेंजर ' आहे. माझ्या प्रार्थनेला गजानन महाराज धावले ही आनंदाची बाब आहे. श्रीगजानन अनुभव मधील अनुभव वाचून मी महाराजांना विचारलं होतं! महाराज मला नाही का अनुभव देणार? महाराजांनी चांगला घसघशीत अनुभव माझ्या पदरात टाकला.

आता एक लक्षात येतं आहे. त्या संध्याकाळी महाराजांपर्यंत प्रार्थना पोहोचली कारण ती उत्कटता होती. ते अनुसंधान होतं,आर्तता होती. आता महाराजांना एकच मागणं आहे. महाराज मला सतत तुमच्या सोबत जोडून ठेवा. त्या साठी माझ्या मुखी सातत्याने नाम येऊ द्या. श्री गजानन! जय गजानन! श्री गजानन! जय गजानन!

🌺अनुभव-- सौ. कल्पिता किनखेडे, नागपूर

शब्दांकन -- जयंत वेलणकर 9422108069

🌸आपल्या जवळ गजानन महाराजांविषयी काही अनुभव असल्यास स्वागत आहे.

अवश्य वाचा श्रीगजानन अनुभव पुस्तक

भाग एक, यात बावन्न अनुभव आहेत. सहयोग राशी फक्त रुपये पन्नास. भाग दोन यात एकूण बावन्न अनुभव आहेत (५३ ते १०४ ) फक्त रुपये पन्नास. भाग तीन बावन्न अनुभव फक्त रुपये पन्नास

🌷श्रीगजानन अनुभव पुस्तक एमेझाॅन वर उपलब्ध आहे.

..................