🌺अनुभव १६८🌺 अतिथी देवो भव

........

"श्री "

गजानन महाराज की जय! (🌺अनुभव १६८)

अतिथी देवो भव

जय गजानन! आपण गजानन महाराजांचे भक्त! जीवनात महाराजांचा फार मोठा आधार वाटतो. अर्थातच दैनंदिन जीवनात कधी काही संकट आले तर पहिले आठवतात ते गजानन महाराज. कळकळीने हाक मारली की त्यांच्या अस्तित्वाची जाणीव होते अन् फार मोठा दिलासा मिळतो.

मध्यंतरी आमची धाकटी सूनबाई बाळंत होऊन तिला पुत्ररत्न प्राप्त झालं. स्वाभाविकपणेच आम्हा सर्वांनाच आनंद झाला, पण बाळाची तब्येत बिघडली, बाळाला श्वास घेण्यास त्रास होतोय असं लक्षात येऊन डाॅक्टरांच्या मते त्याला लहान बाळांच्या दवाखान्यात हलविणे क्रमप्राप्त झालं. त्याला आय. सी. यू. मधे ठेवण्यात आलं. बाळाला बघायला फक्त बाळाचा 'बाबा' येईल असं डाॅक्टरांनी सांगितलं.

बाळाला बरं वाटेल या आशेत आमची प्रतिक्षा सुरू झाली. आम्हा सगळ्यांच्याच मनाची घालमेल होत होती. त्या दिवशी मुलगा जेवायला घरी आला अन सांगू लागला, बाळाला उलट्या होताहेत. औषध सुरू आहे पण तरीही डाॅक्टरांनी ' देवाजवळ प्रार्थना करा ' असं सांगितलं आहे. ते ऐकून माझे डोळे डबडबले. अशावेळेस महाराजांशिवाय कुणाचा आधार वाटणार? मी महाराजांच्या मूर्तीसमोर उभी झाले. त्यांची करूणा भाकू लागले. कळवळून बोलले. ' महाराज बाळाला बरं करा. मी तेरावा अध्याय तेरा वेळा वाचते, त्याच्याकडे लक्ष द्या! '

मला स्पाॅन्डीलायटीसचा त्रास असल्याने एकदम सलग वाचन मला शक्य नव्हतं, पण यथाशक्ती अध्याय वाचन करण्याचा मी निर्धार केला.

माझं वाचन सुरू झालं. वाचनात पुंडलिक भोकरेंच्या दुःखाचं वर्णन आलं आणि ' देवा न नेई दिवा भला हा माझ्या वंशाचा ' ओळ आली की मन गलबलून येत होतं आणि शेवटी ' सांग करून वारीला, पुंडलिक गेला मुंडगावला, हे जो चरित्र वाचे भला, त्याचे टळेल गंडांतर. ' ही ओवी वाचून मनात आत्मविश्वास जागृत होत होता.

मी वाचनाला बसले होते. हिंमत करून सलग सहाव्यांदा तेरावा अध्याय वाचन होत होतं. वाचत असतानाच दारावरील बेल वाजली. मी हातात पोथी धरूनच दाराशी गेले. समोर पोस्टमन उभे होते, त्यांनी काही कागद मला दिलेत. मी ते घेऊन सही केली, ते जायला निघाले. भर दुपारी ते आलेत.

' अतिथी देवो भव! ' या भावनेतून मी टेबलवरील एक संत्र उजव्या हाती घेऊन त्यांना खुणावलं, आता माझ्या डाव्या हातात उघडलेल्या स्थितीत पोथी होती. खाली हाताचा आधार, करंगळी पासून तीन बोटे पानांमधे, अंगठा व तर्जनी बाहेर. उजव्या हाताने त्यांना संत्र देऊन वाकून नमस्कार केला. मान वर केली, त्यांनी त्यांचा उजवा हात पोथीवर ठेवला अन् माझ्याकडे बघून हसले. त्यांच्याकडे बघून मला आतून असं जाणवलं की ' महाराज कोणत्या रूपात दिलासा देतील सांगता येत नाही. ते निघून गेलेत. माझं लक्ष सहज त्यांनी हात ठेवलेल्या पानावर गेलं, तिथे मला ओव्या दिसल्या ' हा एकुलता एक पुत्र मला | देवा न दिवा नेई भला | हा माझ्या वंशाचा |' माझ्या मनाचा उत्साह वाढला. पाठदुखीचा विसर पडून मी सातव्यांदा तेरावा अध्याय वाचू लागले. थोड्याच वेळात मुलगा सांगत आला, आई दवाखान्यातून फोन आला, बाळाच्या उलट्या थांबल्या आहेत. लवकरच बाळाची दवाखान्यातून मुक्तता झाली.

'अतिथी देवो भव ' चा महाराजांनी इथे असा अनुभव दिला. या आधी मला महाराजांनी ' अतिथी देवो भव ' चा एक आल्हाददायक अनुभव त्यांच्या सहज लीलेतून दिला होता. तो सर्वांनाच आनंददायी वाटावा असा आहे. मी सौ. नंदा उदय जोशी, सध्या बोरीवली मुंबई येथे असते, पण मिस्टरांची नोकरी बदलीची असल्याने, वेगवेगळ्या गावी रहाण्याचा योग आला. मला आठवतं, आम्ही तेव्हा चंद्रपूरला रहात होतो. एकदा अशीच काही अडचण उद्भवली म्हणून मी गजानन महाराजांना ' श्रीगजानन विजयची अकरा पारायणं करीन ' असं बोलले आणि त्याप्रमाणे माझी पारायणं सुरू झालीत. प्रत्येक पारायणानंतर एकवीस मोदकांचा नैवेद्य दाखवावा असं मी ठरवलं होतं. तेव्हा महाराजांनी एक वेगळाच अनुभव दिला. प्रत्येकवेळी एकविसावा मोदक तळण्यासाठी तुपात सोडला की दारावरची बेल वाजणार आणि जो अतिथी रुपात आला, त्याला मी मोदकाचा प्रसाद देणार. प्रत्येक वेळी महाराजांनी हे घडवून आणलं. माझी नऊ पारायणं झाली होती. घरी हे सर्वांनीच अनुभवलं होतं. माझा मुलगा राहुल सहज बोलताना त्याच्या मित्राला ' विजय ' ला हे सर्व सांगता झाला. त्यावर विजयने ही गोष्ट हसण्यावर नेऊन त्याकडे दुर्लक्ष केलं. अशात दहावं पारायण झालं, अकरावंही झालं. त्या शेवटच्या पारायणाला मी एकविसावा मोदक तुपात सोडला अन् दारावरची बेल वाजली. मी दार उघडलं, दारात राहुलचा मित्र उभा होता. महाराजांनी त्या विजयलाच दारात उभं केलं होतं. विजय म्हणाला काकू तुपाचा वास येतोय, त्यावर मी बोलले अरे अकरावं पारायण आताच संपलं मोदक तळते आहे एकविसावा मोदक आहे. ये आत ये, बस. आज गजानन महाराजांचा प्रसाद तुझ्या भाग्यात दिसतोय. त्या दिवशी हसण्यावर नेलेली गोष्ट आज विजयने चांगलीच गांभीर्याने स्वीकारली. मी पण स्मितहास्य करून त्याच्या हातावर मोदक ठेवला आणि बोलले, श्री गजानन! जय गजानन! श्री गजानन! जय गजानन!

🌺अनुभव--सौ. नंदा उदय जोशी, बोरीवली मुंबई

शब्दांकन--जयंत वेलणकर 9422108069

🌸आपल्या जवळ गजानन महाराजांविषयी काही अनुभव असल्यास स्वागत आहे.

🌹अवश्य वाचा श्रीगजानन अनुभव पुस्तक

भाग एक, यात बावन्न अनुभव आहेत. सहयोग राशी फक्त रुपये पन्नास. भाग दोन यात एकूण बावन्न अनुभव आहेत (५३ ते १०४ ) फक्त रुपये पन्नास. भाग तीन बावन्न अनुभव फक्त रुपये पन्नास

श्रीगजानन अनुभव पुस्तक एमेझाॅन वर उपलब्ध आहे.