🌺अनुभव १६९🌺 स्वतः येऊनी मार्ग दाविती

" श्री "

गजानन महाराज की जय!(🌺अनुभव १६९)

स्वतः येऊनी मार्ग दाविती

जय गजानन! समर्थ सद्गुरू श्री गजानन महाराजांचे अनुभव ऐकायला, वाचायला गजानन महाराज भक्तांना अगदी मनापासून आवडतं आणि का नाही आवडणार? कारण त्या अनुभवांमधून आपले महाराज आहेत, ही जाणीव मनाला सुखावून जाते. एक आधार वाटतो. अगदी याच भावनेतून मी

'श्रीगजानन अनुभव ' पुस्तकांचं वाचन केलं तेव्हा मनात भक्तीभाव तर वाढलाच पण मला एक जाणवलं की १९६० पासून तर अगदी अलीकडील काळापर्यंतचे अनुभव यात आहेत. अर्थात साठ वर्षांच्या प्रदीर्घ काळात सातत्याने महाराजांचे हे अनुभव भक्त अनुभवताहेत.

अनुभव आधीचा असो की अलीकडील असो तो मनाला सारखाच आनंद देऊन जातो. असाच एक माझ्या स्मृती पटलावर कोरल्या गेलेला अनुभव मी आज येथे सांगणार आहे. मी माधुरी गणेश आरोंदेकर. खरं तर हा अनुभव म्हणजे माझ्या सासूबाईंना गजानन महाराजांची आलेली प्रचिती आहे. मी त्याची साक्षीदार आहे. तो अनुभव सासूबाईंसोबत मी स्वतः अनुभवला. पण तत्पूर्वी, गजानन महाराज मला कसे माहित? अर्थातच माझ्या सासूबाईंमुळे! माझ्या सासूबाईंना गजानन महाराज कसे माहित? कुणी सांगितले? सांगू? स्वतः श्री गजानन महाराजांनी!

आमचं वास्तव्य भोपाळ, मध्यप्रदेश येथील! सासूबाई शिक्षिका होत्या. शासकीय कन्या उच्चतर माध्यमिक विद्यालय, बैरागढ भोपाळ. ' या शाळेत त्या शिक्षिका म्हणून कार्यरत होत्या. एक दिवस त्या शाळेतून घरी आल्या तेव्हा घरासमोर झाडाखाली एक गृहस्थ उभे दिसलेत. यांना वाटलं कुणी गरजू दिसतोय, म्हणून त्या दृष्टीकोनातून त्यांचं लक्ष तिकडे गेलं. तेव्हा त्या गृहस्थांनी स्मितहास्य करून सासूबाईंना अचानक प्रश्न केला ' शेगांवचे गजानन महाराज माहिती आहेत का?' सासूबाईंनी हे नाव प्रथमच तेव्हा ऐकलं. सहाजिकच त्या म्हणाल्यात, नाही मला या विषयी काहीच कल्पना नाही. त्यावर पुन्हा स्मितहास्य करून ते एक वाक्य बोलले ' ठीक आहे, साखर कमी खात जा आणि असं म्हणून निघून गेलेत. तो सर्व प्रकार सासूबाईंना विचित्र वाटला. एखाद दुसरा दिवस मधे गेला असेल, सासूबाईंचं त्यांच्या मैत्रीणीकडे जाणं झालं, यमुना नानिवडेकर तिचं नाव .डोक्यात तो विषय होताच ,सासूबाईंनी शेगांव आणि गजानन महाराज या विषयी विचारलं मैत्रीणीला गजानन महाराज माहीत होते, तिला गजानन विजय ग्रंथही ठाऊक होता.ती खूप भरभरून महाराजांविषयी बोलली अन् सासूबाईंचा हात धरून देवघराकडे घेऊन गेली. महाराजांचा फोटो पाहून सासूबाई उद्गारल्यात. "अगं हेच आले होते त्या दुपारी, हेच माझ्या सोबत बोलले!" झालं, तोच शुभारंभ ठरला आणि सासूबाई गजानन महाराजांच्या उपासक झाल्यात.

अर्थातच पुढे घरात परीक्षेचा क्षण आला, काही कठीण प्रसंग उद्भवला की गजानन महाराज की जय! धाव रे गजानना! हे समीकरण झालं. एकदा माझ्या मिस्टरांची तब्येत बिघडली. त्यांनी काहीही खाल्लं की लगेच उलटी व्हायची .अगदी पाणी सुध्दा पोटात टिकेना. त्यामुळे ते रोड होत चालले, त्यांना कमालीचा अशक्तपणा जाणवू लागला, बरेच उपाय झालेत, डॉक्टर झालेत. निदान होत नव्हतं. अशातच एका डाॅक्टरांनी अल्सर झाल्याचं निदान करून ' लोणी खायला द्या ' असा सल्ला दिला. माझे सासरे आमच्या नेहमीच्या दुकानात अर्थात जिथून आम्ही तूप आणायचो, तिथे लोणी आणायला गेलेत, तेव्हा दुकानदारानी विचारलं, तुम्ही नेहमीच तूप नेता आज लोणी कसं काय? त्यावर सासऱ्यांनी ' उलटी ' प्रकरण विषद केलं. त्यावर दुकानदार बोलला, पोटातला वायु गोळा खाली सरकला तर जुलाब होतात आणि वर सरकला तर उलट्या होतात. कुणी वायुगोळा जागी बसवणारा असेल तर त्याच्या कडे घेऊन जा.

सुचविलेला उपाय ठीक होता पण अशी योग्य व्यक्ती मिळणार कुठे? मग काय? सासूबाईंनी गजानन महाराजांना साकडं घातलं. मुलाच्या तब्येतीसाठी महाराजांना विनवणी केली. महाराज धावा, तब्येत नाजूक आहे तुम्हीच मार्गदर्शन करा..

त्या रात्री गजानन महाराज स्वप्नात आलेत. आमच्या घराजवळच एक मेहरूणकर आजी रहायच्या,गजानन महाराजांनी त्या आजींचा चेहरा स्वप्नात स्पष्टपणे दाखवून ,त्यांच्याकडे बोट दाखवून दिशादर्शन केलं. महाराजांनी दाखविलेली दिशा! त्यामुळेच आत्मविश्वासाने आम्ही मिस्टरांना घेऊन मेहरूणकर आजींकडे गेलो. आजींकडे भिंतीवर गजानन महाराजांचा फोटो पाहून जीवात जीव आला, आजींना 'वायुगोळा ' विषयी विचारपूस करताच आजी उद्गारल्यात "अहो करते करविते स्वामी भले श्री गजानन महाराज!" लगेच उपचार सुरू. त्यानी तेल माॅलीश करून पोटाला चोळलं. पोटाला पट्टी बांधून महाराजांना हात जोडले. त्यांचा आत्मविश्वास आणि महाराजांवरील विश्वास दांडगा होता. त्यांनी लगेचच महाराजांचं स्मरण करीत मिस्टरांना एक बिस्किट खायला दिलं , मिस्टर भितीपोटी बिस्किट घेईनात त्यावर आजी बोलल्या अरे खा काही होणार नाही. मिस्टरांनी हिंमत करून बिस्किट खाल्लं आणि गजानन महाराजांनी केलेला दिशानिर्देश योग्य होता हे लक्षात आलं.

बिस्किट पचलं, उलटी थांबली, रोग पळाला. मेहरूणकर आजींनी फोटोसमोर हात जोडून जयघोष केला, आम्हीही त्यांच्या आवाजात आवाज मिळवून साथ दिली आणि खोलीत एकच निनाद झाला.. श्री गजानन! जय गजानन ! श्री गजानन!जय गजानन!

🌺अनुभव-- माधुरी गणेश आरोंदेकर, भोपाळ

शब्दांकन --जयंत वेलणकर 9422108069

🌹आपल्या जवळ गजानन महाराजांविषयी काही अनुभव असल्यास स्वागत आहे.

🌸अवश्य वाचा श्रीगजानन अनुभव पुस्तक

भाग एक, यात बावन्न अनुभव आहेत. सहयोग राशी फक्त रुपये पन्नास. भाग दोन यात एकूण बावन्न अनुभव आहेत (५३ ते १०४ ) फक्त रुपये पन्नास.भाग तीन बावन्न अनुभव फक्त रुपये पन्नास

श्रीगजानन अनुभव पुस्तक एमेझाॅन वर उपलब्ध आहे.