🌺अनुभव १७२ उपास्यापदी भाव उपासके ठेवावा!

" श्री "

गजानन महाराज की जय!(🌺अनुभव १७२)

उपास्यापदी भाव उपासके ठेवावा!

जय गजानन! मागील वर्षी यांना जीवघेणा अपघात झाला. अपघातापूर्वी यांना एक दुःस्वप्न पडलं. त्यात ह्यांनी पाहिलं की अपघात होऊन यांच्या डोक्याला जबरदस्त दुखापत झाली आहे. त्या स्वप्नामुळे यांच्या मनात कमालीची भिती बसली. अर्थात नसती काळजी नको म्हणून घरात आम्हा कुणालाच त्यांनी याविषयी काही सांगितलं नाही. पण वागण्यात एक भिती होतीच. अस्वस्थ मनाने महाराजांना प्रार्थनाही होत होती. ' महाराज शत्रुवरही असा प्रसंग यायला नको. ' पण विधीलिखित कधी टळलं आहे? व्हायचं ते झालच.

माझे मिस्टर मिलिंद बोरडकर, न्याय मंदिर, नागपूर येथे उच्च श्रेणीत लघु लेखक म्हणून कार्यरत होते. आता निवृत्त आहेत. त्या दिवशी ऑफिस मधून निघताना यांनी फोन केला. 'निघतोच आहे! '

हे ऑफीसमधून निघालेत. न्याय मंदिराच्या जवळपासच, कुठल्याशा वाहनाची धडक बसून हे गाडीवरून फेकल्या गेलेत. काही मिनिटं शुध्दीवर होते, पण हतबल होते. चार दोन अनोळखी लोकांनी फोटो तेवढे काढलेत. गजानन महाराजांचं नाव ओठांवर आलं अन् हे बेशुद्धावस्थेत गेलेत. स्वप्नात पाहिल्या प्रमाणेच डोक्याला जबर इजा झाली होती. त्याचवेळी मिस्टरांना ओळखणारे तीन वकील, कोर्टाचं कामकाज संपल्यामुळे घरी जायला निघाले होते, त्यांनी ह्यांना पाहिलं .एड.रुढे, अॅड राठोड, एड.कुबडे. एकीकडे हाॅस्पिटल मधे मिस्टरांना घेऊन जातानाच घरी फोन करुन त्यांनी आम्हालाही ही बातमी दिली. आम्ही सर्व नातेवाईक जवळपास सोबतच हाॅस्पिटल मधे घाईनेच पोहोचलो.

भूषण पांढरीपांडे, माझा भाऊ! अर्थातच मी माहेरून पांढरीपांडे, हे ओघानंच आलं. तर आमच्याकडे माहेरी गजानन महाराजांचं वेड आहे असं म्हटलं तर वावगं होणार नाही. योगायोगानं मला, मिस्टरांना आणि आमचा मुलगा 'अक्षय ' आम्हा सर्वांनाच, श्रीगजानन विजय ग्रंथाचं पारायण, श्रीगजानन महाराजांची उपासना, उपासना केन्द्रात होणारे नामस्मरणादी कार्यक्रम, महाराजांची निघणारी पालखी, या सर्वच गोष्टीत विषेश रुची आहे. त्यामुळे काही गडबड झाली की

' गजानन महाराज! ' हा आमचा श्रध्देचा विषय आहे .तसंच माझ्या बहीणींचही आहे. तर झालं असं की, योगायोग म्हणा किंवा महाराजांची योजना म्हणा भूषणच्या खिशात एका लहान बाटलीत गजानन महाराजांचं तीर्थ होतं. त्याचे दोन थेंब मी मिलिंदच्या ओठात सोडले आणि गजानन महाराजांचं नाव घेतलं. डाॅक्टर आलेत. डाॅक्टरांनी प्राथमिक तपासणी करून मिस्टरांना आय सी यू त अॅडमिट करून घेतलं. त्यावेळी डाॅक्टर आमच्याशी जे काही बोलले, त्यातून आम्हाला झालेल्या बोधातून बुध्दी बधिर झाली. अनेक प्रश्न डोक्यात गोंधळ घालू लागलेत.

ब्रेन इन्जुरी झाली आहे, किती गंभीर आहे? हे आत्ताच सांगता येणार नाही. शुद्धीवर केव्हा येतील? येतील की नाही? आले तर स्मृती परत येईल की नाही? स्मृती आली तरी पूर्ण प्रमाणात येईल का? ते सर्वांना ओळखतील का? ब्रेनचं ऑपरेशन करण्याची वेळ येईल का? ब्रेनच्या मेजर सर्जरी नंतर माणूस पूर्णपणे निर्दोष असण्याची शक्यता फारच कमी असते. हे आजारपण किती दिवस चालणार? एक ना अनेक प्रश्नांनी आमच्या मनावरील ताण सतत वाढत होता. आमच्या सोबत परिचयातील भक्तगण पण चिंतित होते. त्यांचीही गजानन महाराजांना प्रार्थना होत होती.चिंता सर्वांनाच होती.

अशात उपासना केन्द्रातून सरांचा फोन आला. प्रथम भूषणशी बोलून, हाॅस्पिटलमधे आम्हा सर्वांनाच त्यांनी सांगितलं. " 'स्तोत्र मंत्राचे विज्ञान ' नावाचं स्वामी सवितानंदांचं एक पुस्तक आहे. त्यात त्यांनी स्मरण शक्ती साठी, स्मरणा साठी ' हरे राम हरे राम, राम राम हरे हरे! हरे कृष्ण, हरे कृष्ण, कृष्ण कृष्ण हरे हरे!' हा मंत्र उल्लेख केला आहे. मी स्वतः एका व्यक्तीला हा मंत्र सांगितला पॅरॅलिसिस केस मधे त्यांना त्याचा फायदा झाला. सध्याच मिलिंदला म्हणता येणार नाही तेव्हा बाहेर व घरी सर्व नातेवाईकांनी प्रार्थनापूर्वक सतत याचा जप करा. या साठी सद्गुरू गजानन महाराजांचा आशिर्वाद घेण्यासाठी रोज प्रथम ' गणी गण गणांत बोते ' एक माळ जप करून, पुढे हा जप सतत करा. बघू या. मिलिंद शुध्दीवर आला की त्यालाही आपण जप करायला सांगायचा, शिवाय श्रीगजानन विजय ग्र॔थाचा तेरावा अध्याय रोज प्रार्थनापूर्वक वाचून सेवा महाराजांना अर्पण करा!"

सांगितल्या प्रमाणे मिस्टरांचे मोठे भाऊ, माझे भाऊ बहीण, अन्यही नातेवाईकांनी या प्रमाणे महाराजांना प्रार्थना आणि जप करणं सुरू केलं, घरी आणि दवाखान्यातही. दवाखान्यात तर एक दिवस आम्ही सर्व, काही पुटपुटतो आहे असं पाहून नर्सनी विचारलही तुम्ही एकमेकांशी न बोलता हे काय करताय?'प्रार्थना!' असं म्हणून तिचं समाधान केलं. सर्वांचा अंदाज होता दीड महिना लागेल. दहाव्या दिवशी मिलिंदना शुध्द आली. तुलनेत दहा दिवस आज कमी वाटले तरीही आपलं माणूस दहा दिवस निपचित पडलं आहे हा भयावह अनुभव तेव्हा घेतला. तो आजही अंगावर शहारे आणणारा आहे. शुध्दीवर आल्यावर मिलींदनी सर्वांनाच ओळखलं. ब्रेनचं ऑपरेशन टळलं. डाॅक्टर केळकर म्हणाले हे मिरॅकल आहे. चेहर्‍याला लागलेला मार इतका जबर होता की चेहरा थोडा वाकडा झाला. पण होईल तोही बरा. डोक्यातील सर्व प्रश्न बाजूला सरलेत. मिस्टर चक्क गजानन महाराजांच्या पालखीत उपस्थित राहू शकले. सतराव्या दिवशी डाॅक्टरांनी त्यांना सुटी दिली.

घरी परतल्यावर मिस्टर सतत म्हणत होते की,

' पायजमा, निळा कुडता, कपाळावर गंध असलेले एक गृहस्थ आय सी यू मधे माझ्या सोबत होते. मला तरी वाटतं तो माझा मित्र श्रीपाद होता. त्यानी माझी खूप सेवा केली. मी म्हणायचो, ' श्रीपाद, माझं अंग दुखतय रे, तेव्हा श्रीपाद मला माझं अंग चेपून देत होता. ' आम्ही त्यांना खूप समजावलं की तिथे कुणालाच प्रवेश नव्हता. कुणी तिथे येईलच कसं? पण हे ऐकायलाच तयार नव्हते. अशात एक दिवस श्रीपाद यांना घरी भेटायला आला. तब्येतीची चौकशी करून म्हणाला, ' अरे माझी खूप इच्छा होती आत येऊन तुझी सेवा करण्याची, पण डाॅक्टर कुणालाच आत सोडत नव्हते. ' ते ऐकून मिस्टरांना चांगलाच आश्चर्याचा धक्का बसला आणि त्यांच्या साठी तो प्रश्न अनुत्तरितच राहिला. कोण होता तो?

पण आता आम्ही ठरवलं आहे. या प्रश्नाचा शोध घेण्याचं कारण नाही. फक्त एवढंच करायचं की, गजानन महाराजांना मनापासून प्रार्थना करायची की, ' महाराज तेराव्या अध्यायात, दासगणूंनी श्रीकृष्णाची स्तुती करताना म्हटलय की, गोप निर्भय करण्यासाठी तुम्ही कालीयाला तुडवून दूर पाठवलं तसं आम्हा भक्तांच्या दुर्दैवाला तुडवून महाराज, आम्हा भक्तांना संकट मुक्त करा. त्या साठी आम्हा सर्वांच्या मुखी तुमचं नाम येऊ द्या.. श्री गजानन ! जय गजानन! श्री गजानन ! जय गजानन!

🌺अनुभव-- सौ मानसी मिलिंद बोरडकर नागपूर

शब्दांकन -- जयंत वेलणकर 9422108069

🌸आपल्या जवळ गजानन महाराजांविषयी काही अनुभव असल्यास स्वागत आहे.

🌹अवश्य वाचा श्रीगजानन अनुभव पुस्तक

भाग एक, यात बावन्न अनुभव आहेत. सहयोग राशी फक्त रुपये पन्नास. भाग दोन यात एकूण बावन्न अनुभव आहेत (५३ ते १०४ ) फक्त रुपये पन्नास.भाग तीन बावन्न अनुभव (१५७पर्यंत)फक्त रुपये पन्नास

श्रीगजानन अनुभव पुस्तक एमेझाॅन वर उपलब्ध आहे.