🌺अनुभव १७५🌺 हाकेला धावणारा देव

" श्री "

गजानन महाराज की जय (🌺अनुभव १७५)

हाकेला धावणारा देव

जय गजानन! मागील पंचवीस तीस वर्षांच्या काळात अनेक ठिकाणी गजानन महाराजांची मंदिरे अस्तित्वात आलीत आणि जवळपास प्रत्येकच मंदिरात तिथे भावभक्तीने येणाऱ्या भक्तांना विविध प्रसंगातून महाराजांच्या अस्तित्वाची जाणीवही झाली. काही ठिकाणी तर मूर्तीची प्रतिष्ठापना होण्याआधीच कधी स्वप्नदृष्टांतातून, तर कधी विलक्षण प्रसंगातून, महाराजांनी 'भक्ती करा प्रचिती येईल'. असा संदेश भक्तांना दिला. या कथनाला त्रिमूर्तीनगर नागपूर येथील गजानन महाराजांचे मंदिर अपवाद नाही!

त्रिमूर्ती नगरातील या मंदिरासाठी साधारण १९९१ च्या सुमारास जागा घेण्यात आली. इ.स.१९९४ नंतर गजानन महाराज मंदिर उभारण्या संदर्भात विचार आणि अन्य कामाला गती प्राप्त झाली आणि प्रत्यक्षात इ.स. १९९९ डिसेंबर मध्ये मंदिराच्या बांधकामास सुरुवात झाली. अर्थात, ई .स.२०२४. किंबहुना, २०२४~२०२५ हे मंदिराचे रौप्य महोत्सवी वर्ष!

मागील २५ वर्षात मंदिरात असंख्य भक्त जुळत गेलेत आणि मंदिराच्या एकूण प्रगतीचा आलेखही सतत उंचावत गेला. हे मंदिर व्यवस्थापनाने जवळून अनुभवले. आमचे राजाभाऊ तलमले मंदिराचे संस्थापक, शांतपणे पण गतिशीलतेने कार्य करण्याच्या त्यांच्या शैलीने, मंदिरात विविध देवतांच्या मूर्तींची स्थापना होणं आणि धार्मिक कार्यक्रमांचं आयोजन होऊन एकूणच प्रासादिक वातावरणात होणारी सर्व प्रगती भाविकांनी जवळून अनुभवली आहे, अनुभवताहेत. हे रौप्य महोत्सवी वर्ष भक्तांच्या सहकार्यातून उत्साहात साजरं व्हावं, असा व्यवस्थापनाचा मानस आहे.

मंदिरासाठी मूर्ती आणतानाच आलेला दिव्य अनुभव आणि मंदिरात होणाऱ्या वा झालेल्या विविध कार्यक्रमांविषयीचा वृत्तांत आपणास सांगण्याचा योग महाराजांनी माझ्यासाठी जुळवून आणला. हे मी माझं भाग्य समजतो. मी राजेश रामपूरकर त्रिमूर्तीनगर भागातच वास्तव्याला असतो. मागील अनेक वर्षांपासून मंदिराशी जुळलो आहे. त्यामुळे अनेक गोष्टी जवळून पाहता आल्या, ऐकता आल्या.

जयपूर येथून मूर्ती आणणे ,मूर्तीची प्राणप्रतिष्ठा होणे , कळसारोहण होणे, बांधकामात प्रगती होणे अशा सर्वच टप्प्यांवर महाराजांनी व्यवस्थापनाला अनुभव समृद्ध केलं .२२ डिसेंबर १९९९ ला श्री दत्त जयंतीच्या शुभ मुहूर्तावर श्री गजानन महाराजांच्या मूर्तीची प्राणप्रतिष्ठा आदरणीय वेदमूर्ती गोविंदराव पत्राळे व श्री बाबुराव धामणकर यांच्या पौरोहित्याखाली करण्यात आली आणि तात्काळ बांधकामाने वेग पकडला. २४ जानेवारी २००० ला करवीरपीठाचे शंकराचार्य श्री जयेंद्र सरस्वती यांच्या हस्ते कळसारोहण करण्यात आलं, तर त्याचवेळी एकीकडे तळघरात ध्यानकक्षही अस्तित्वात आले होते .२६ फेब्रुवारी २००२ च्या प्रकट दिनापूर्वी भागवताचार्य श्रीधर शास्त्री पोफळी यांचं भागवत भगवती सभागृहात जे की मंदिराच्या बरोबर समोर आहे मध्ये रस्ता आहे .त्या सभागृहात आयोजित केलं होतं. जन्माष्टमीचा दिवस होता. खूप पाऊस आणि विजांचा कडकडाट होत होता. भागवत सुरू असतानाच विजेचा कडकडाट होऊन विजेचा लोळ सभागृहाच्या दिशेने आला मात्र कठड्याला स्पर्श करून मंदिराच्या दिशेने महाराजांकडे निघून गेला आणि हे दृश्य पाहणारे डोळे विस्फारून पहात राहिले.

आज पर्यंत भागवत सप्ताहाच्या निमित्ताने सर्वश्री डॉक्टर दत्ताजी हरकरे ,खराटे महाराज ,मुरली दास महाराज, राधे राधे महाराज, देवनाथ महाराज ,या मान्यवरांनी मंदिरात हजेरी लावली. लाखो भक्त भागवत सप्ताहाचा लाभ घेत असतात. दरवर्षी प्रकट दिनाच्या दिवशी महाराजांच्या पालखीसह शोभायात्रा , दिंडी यात्रा काढण्यात येते. प्रथम वर्षी तीस वर असणारी असणारी दिंडी संख्या आता तीनशेच्या पार पोचली आहे. तर श्री गजानन महाराज प्रगट दिन महोत्सवाच्या शेवटी होणाऱ्या महाप्रसादाचा आस्वाद, लाखो भाविक घेत असतात.

'गजानन महाराज म्हणजे हाकेला धावणारा देव!' हा अनुभव याही मंदिरात अनेकांना आला आहे. मंदिरात भेटणाऱ्या अनेक भक्तांच्या बोलण्यातून याची जाणीव होत असते. काही भक्तांनी त्यांचे अनुभव श्री गजानन अनुभव या पुस्तकातून मांडले पण आहेत. असं असं काही कानावर आलं की मनात विचार येतात, का नाही धावणार ते हाकेला? मूर्ती रुपात इथे स्थानापन्न होण्यापूर्वीच तर संबंधितांना अनुभव दिला आहे. मूर्ती आणण्यासाठी जयपूरला गेलेल्या लोकांकडून ऐकलेली हकीकत मला आठवते. ते सांगतात...

तेव्हा आमची मीटिंग झाली. मूर्ती कशी असावी? आकार केवढा असावा ?कुठून आणावी?आदी विषयांवर चर्चा होऊन, मूर्ती जयपूरहून आणावी असे ठरले. मग आम्ही गजानन महाराजांना प्रार्थना केली. ' महाराज आपण सर्व जाणताच. योग्यरूपात मंदिरात यावे.' प्रार्थना करूनआम्ही पाच सहा जण मूर्ती आणण्यासाठी जयपूरला रवाना झालो येथून आम्ही तेथील मूर्तीकारांविषयी माहिती घेतली होतीच. त्याप्रमाणे तिथे पोहोचल्यावर जयपूर मधील सर्वच मूर्तीकारांकडे पायपीट केली, तिथेही एकाला दुसऱ्याचा संदर्भ विचारून सर्व ठिकाणे पालथी घातली. परंतु केवळ निराशा आणि निराशाच पदरी पडली आणि आम्ही सर्व अतिशय उदास झालोत आणि 'महाराज हेच का हो फळ आमच्या प्रार्थनेला?' या भावनेतून नागपूरला परत येण्यासाठी जयपूर स्टेशनला परतलो. स्टेशनला प्लॅटफॉर्मवर आम्ही बोलत उभे होतो. चेहऱ्यावरील औदासिन्य उघड दिसत होतं. बोलण्यातून निराशा डोकावत होती. काही मिनिटांनी आम्हाला जाणवलं, की एक वृद्ध गृहस्थ आमच्या बाजूला उभे राहूनआमचं बोलणं चिकित्सक मुद्रेने ऐकताहेत. आमचं त्यांच्याकडे लक्ष गेल्यावर त्यांनी विचारलं काय झालं ?त्यावर आमचं म्हणणं शांतपणे ऐकून ते बोलले, माझ्या एका परिचित मूर्तीकाराकडे तुम्हाला हवी तशी मूर्ती तयार आहे .प्रथम आम्हा सर्वांच्याच मनात आलं, आपण तर सर्वच दुकानातून फिरलो आहोत, त्यामुळे सर्वांनीच निरीच्छतेने त्यांच्याकडे बघितलं. मात्र त्यांनी विशेष आग्रह केल्यावरून सर्वांनीच, चला , हा ही प्रयत्न करून पाहू या भावनेतून त्यांच्या सोबत जाण्याचा निर्णय घेतला.

ते आम्हाला एका वयोवृद्ध माणसाकडे घेऊन गेलेत. तो एक वृद्ध, ज्याचं आयुष्य सरत आलं आहे, पण त्याचमुळे अनुभव समृद्ध झालेला आहे असा मूर्तीकार होता. आयुष्यात अनेक मूर्ती तयार करून विकल्यानंतर त्याने आयुष्यातील शेवटची म्हणून गजानन महाराजांची एक मूर्ती तयार केली होती. त्याचा जीव त्या मूर्तीत अडकला होता, तो त्याच्या गजानन बाबाला विनवत होता, बाबा, माझ्या डोळ्या देखत ही मूर्ती विकल्या जावी. आम्हाला सोबत नेलेल्या त्या वृद्ध गृहस्थांनी त्या मूर्तीकाराला म्हटलं, तुमच्या कडील मूर्ती यांना हवी आहे .ते ऐकून त्याला अत्यंत आनंद झाला. आम्हाला ती मूर्ती आवडली. किमती विषयी बोलताच तो म्हणाला, 'माझे या मूर्तीवर अलोट प्रेम आहे .माझे प्राण त्यात अडकले होते आता मी मुक्त होईन'! तुम्हाला योग्य वाटेल ते द्या ! ते ऐकून आमचे डोळे पाणावले. योग्य ती राशी त्याच्या सुपूर्द केल्यानंतर त्याने मूर्तीसाठी बिल्टी काढली का ? वगैरे प्रश्न विचारूनआम्हाला बुचकाळ्यात टाकलं, पण आमची तीव्र इच्छा प्रभावी ठरून , त्यानं खोका पॅक करून दिला. तो जनरल डब्यात ठेवून आम्ही आळीपाळीने लक्ष देत, नागपूरकडे निघालोआणि महाराजांच्या कृपेने निर्विघ्नपणे त्रिमूर्ती नगरला पोहोचलो. मूर्ती मिळणार नाही हे जवळपास निश्चित झालेले असताना शेवटच्या क्षणी अचानक परिस्थिती बदलून आमच्या साठी आणि आयुष्याच्या शेवटच्या काळात त्या मूर्तीकारासाठी सहाय्यक ठरलेले ते वृद्ध गृहस्थ कोण होते ?याचा विचार आम्ही आपापल्या परीने केला आणि पॅकिंग उघडून मूर्ती बाहेर काढताना एकच जयघोष केला श्री गजानन! जय गजानन!श्री गजानन!जय गजानन!

🌺अनुभव-- राजेश रामपूरकर , त्रिमूर्तीनगर ,नागपूर

शब्दांकन -- जयंत वेलणकर 9422108069

🌸आपल्या जवळ गजानन महाराजांविषयी काही अनुभव असल्यास स्वागत आहे.

🌹अवश्य वाचा श्रीगजानन अनुभव पुस्तक

भाग एक, यात बावन्न अनुभव आहेत. सहयोग राशी फक्त रुपये पन्नास. भाग दोन यात एकूण बावन्न अनुभव आहेत (५३ ते १०४ ) फक्त रुपये पन्नास.भाग तीन बावन्न अनुभव (१५७पर्यंत)फक्त रुपये पन्नास

श्रीगजानन अनुभव पुस्तक एमेझाॅन वर उपलब्ध आहे.

Want to see Trimurti Nagar, Shri Gajanan Maharaj Temple ? Click here https://youtu.be/QRpYakv_rG8?si=YJt71VBn9ZyVj46k